Undirbúningsnefnd 2016

Á myndinni eru (aftari röð frá vinstri) Hrafn, Sigurður Bjarni, Lárus, Kristján Þór G, Guðjón, Kristján Þór S. og Þráinn. (Fremri röð frá vinstri) Hallur, Laufey, María og Halldór. Á myndina vantar Emil Hreiðar Björnsson.

HRAFN ÁGÚSTSSON
Lífstílsleiðbeinandi
Hrafn er rekstrarfræðingur og sjálfstætt starfandi lífsstílsleiðbeinandi. Síðustu 19 ár hefur hann unnið fyrir Herbalife International og stundar viðskipti í 10 löndum. Hann hefur sótt GLS ráðstefnur síðustu ár og er heillaður af gæðum ráðstefnunnar og hvernig skilboð Jesú Krists eiga sterkt erindi við sérhvern þann sem reynir að leiða aðra áfram.

SIGURÐUR BJARNI GÍSLASON
Ráðgjafi í verkfræði og verkefnastjórnun, Lota ráðgjöf
Sigurður Bjarni er með meistarapróf í byggingarverkfræði frá HÍ og MPM gráðu frá HR (verkefnastjórnun). Hann starfar í dag hjá Lotu ráðgjöf við brunavarnaráðgjöf. Einnig er hann eigandi að bókunarþjónustu sem heitir Iceland Summer ehf. Sigurður hefur nokkurra ára reynslu af viðburðarstjórnun, m.a. hátíðir og tónleikahald og hefur verið í markaðs- og undirbúningsnefnd GLS frá upphafi hér á Íslandi. Hann er virkur meðlimur og meðstofnandi Salts kristins samfélags og var meðal annars í stjórn þess félags um skeið. Hann leiðir nú tónlistarstarfið þar en Salt er hreyfing innan Þjóðkirkjunnar.

LÁRUS ÞÓR JÓNSSON
Sjálfstætt starfandi heimilislæknir, Domus Medica.
Lárus nam heimilislækningar í Svíþjóð og hefur starfað sem heilsugæslulæknir í Snæfellsbæ, Hvammstanga og á Heilsugæslu Hlíða. Hann sat í sóknarnefndum kirkjunnar bæði í Ólafsvík og Hvammstanga. Hann var einn af stofnendum Salts kristins samfélags og hefur setið í stjórn þess frá upphafi. Hann fór á GLS í Osló 2007 ásamt fleiri Íslendingum og hreifst mjög og fannst að "Íslendingar yrðu að fá sitt GLS". Hann hefur verið í undirbúningsnefnd GLS frá upphafi.

KRISTJÁN ÞÓR GUNNARSSON
Framkvæmdastjóri, SIAL ehf.
Kristján Þór er matvælafræðingur frá Háskóla Íslands. Hann hefur starfað sl. 25 ár að sölu-og markaðssetningu á íslenskum fiski víða um heim. Hann hefur undanfarin ár tekið þátt í ýmsum störfum innan kirkjunnar s.s. Alfa-námskeiðum, lofgjörðar-og bænastundum, karlahópum, heimahópum, auk nefndarstarfa í GLS undirbúningsnefndinni.

GUÐJÓN VILHJÁLMSSON
Tölvunarfræðingur, TM Software
Guðjón er tölvunarfræðingur frá HÍ og með MS í hugbúnaðarverkfræði. Hann hefur starfað við hugbúnaðarþróun hjá TM Software frá árinu 2005. Hann er meðlimur í Íslensku Kristskirkjunni og hefur tekið virkan þátt í safnaðarstarfinu þar frá árinu 2007. Hann sótti fyrst GLS ráðstefnu hér á Íslandi árið 2012 og fór fyrir hönd undirbúningsnefndarinnar árið eftir á GLS ráðstefnuna í Chicago. "Ég hef stundum sagt að ég hafi upplifað þrjá vendipunkta í mínu lífi: Þegar ég giftist konunni minni, þegar ég eignaðist fyrsta barnið og þegar ég fór fyrst á GLS." -Guðjón V.

KRISTJÁN ÞÓR SVERRISSON
Viðskiptafræðingur, Kristniboðssambandið
Kristján er viðskiptafræðingur og hefur starfað hjá Kristniboðssambandinu sl. 10 ár. Hann var í fimm ár ásamt fjölskyldu sinni starfandi kristniboði í Eþíópíu þar sem hann sinnti kennslu, boðunarstarfi og ýmsum þróunarsamvinnuverkefnum. Hann er áhugamaður um íþróttir og útivist.

ÞRÁINN ÞORVALDSSON
Fyrrverandi framkvæmdastjóri
Þráinn er viðskiptafræðingur frá HÍ og með masterpróf í markaðs- og sölufræðum frá breskum háskóla. Starfssvið hans hefur einkum beinst að útflutningi og markaðssetningu íslenskra neytendavara erlendis, mest í Norður Ameríku og Evrópu og endurskipulagningu fyrirtækja. Þráinn hefur verið framkvæmdastjóri nokkurra fyrirtækja; Loðskins ehf. á Sauðárkróki, ullarvöruútflutningsfyrirtækisins Hildu hf., matvælafyrirtækisins Íslensks fransks eldhúss hf. og rekið eigið ráðgjafafyrirtæki. Hann var fyrsti framkvæmdastjóri Útflutningsráðs Íslands og nú síðast einn af stofnendum og framkvæmdastjóri SagaMedica ehf. þar til hann fór á eftirlaun. Þráinn hefur setið í fjölda stjórna fyrirtækja og samtaka. Hann hefur unnið fyrir Þjóðkirkjuna og setið í sóknarnefnd Bústaðakirkju í 24 ár og var formaður um tíma. Hann er nú stjórnarformaður Útfararstofu kirkjugarðanna sem er í eigu Kirkjugarða Reykjavíkurprófastsdæma.

HALLUR HALLSSON
Fréttamaður og sagnfræðingur
Hallur Hallsson er með BA í ensku og sagnfræði, var blaðamaður á Dagblaðinu og Morgunblaðinu; fréttamaður í Sjónvarpinu og Stöð 2. Hann hefur rekið bókaútgáfu, kynningarfyrirtæki og ritað sagnfræðiverk, vinnur nú meðal annars að ritun sögu reykvískra sjómanna.

LAUFEY BIRGISDÓTTIR
Vörustjóri, Actavis
Laufey er menntuð í verkefnastjórnun en er einnig með gráðu í aðfanga- og straumlínustjórnun. Hún starfar í dag hjá Actavis við framleiðslustjórnun og innkaup en hún hefur verið þar sl. 11ár. Áður starfaði hún sem innkaupa- og sölustjóri hjá IKEA. Laufey hefur reynslu af barnastarfi, kennslu og stjórnun ýmissa viðburða innan sem utan kirkjuna. Einnig starfaði hún sem ritari, kennari og aðstoðarskólastjóri í Bibliuskólanum JHU Arken í Svíþjóð í nokkur ár. Laufey hefur verið virk í starfi innan Vegarins til margra ára og er nú í Hvítasunnukirkjunni í Reykjavík. Hún hefur verið í markaðs- og undirbúningsnefnd GLS frá upphafi hér á Íslandi.

MARÍA ERICSDÓTTIR
Ráðgjafi í Mörkun og eigandi, III Strategic Design Consultancy ehf.
María er grafískur hönnuður (BS) og viðskiptafræðingur (MS). Hún hefur starfað í Bandaríkjunum, Danmörku og hér heima við hönnun, mörkun og markaðsetningu fyrir auglýsingastofur og í markaðsdeildum. Síðastliðin 5 ár hefur hún séð um vörumerkjastjórnun fyrir íslenska fyrirtækið Sóley Organics. Hún er einnig stjórnandi Barnakirkju Aðventsafnaðarins í Reykjavík sem er hluti Kirkju sjöunda dags aðventista á Íslandi.

HALLDÓR PÁLSSON
Sölustjóri hjá Kaja Studios
Halldór hefur verið bókaútgefandi í 20 ár m.a. gefið út bækur um 16 lönd. Hann hefur hitt hundruð merkra manna á starfsferlinum, þar á meðal fengið einkafundi með Kofi Annan aðalritara S.Þ. og Viktoríu prinsessu Svíþjóðar og fjölmörgum forsetum, ráðherrum, biskupum og stjórnendum fyrirtækja. Halldór er einn af stofnendum ABC barnahjálpar.

EMIL HREIÐAR BJÖRNSSON
Grafískur hönnuður, Samskipti ehf & Grafiker
Emil er grafískur hönnuður hjá Samskiptum ehf. og auk þess með eigin rekstur. Hann hefur dágóða reynslu af markaðsstörfum og nýtir það nú sem markaðsstjóri GLS. Emil er einnig tónlistarmaður og hefur leitt tónlistarflutning á ráðstefnunum síðastliðin nokkur ár.